Os organizadores do festival Vigo Porté pospuxeron a celebración da novena edición do Trofeo de Baile, prevista para os días 11,12 e 13 de decembro, ata 2021 pola pandemia.

Segundo trasladaron os organizadores do evento, esta decisión foi adoptada “debido aos últimos acontecementos da pandemia do virus da COVID-19 nos que cada día aparecen novos casos con novos confinamentos”.

Neste sentido, sinalaron o “díficil” que resultou adoptar esta medida dada “a ilusión dos bailaríns por participar nesta edición”. No entanto, incidiron na importancia de que os participantes, o público e a organización do festival poidan gozar do mesmo “sen restricións nin incertezas”.

En concreto, o festival estaba previsto para o pasado mes de abril, pero a súa celebración pospúxose primeiro ata xullo e logo ata decembro pola pandemia. Finalmente, decidiuse que a novena edición do evento teña lugar o próximo ano.