A área sanitaria de Vigo puxo en funcionamento un novo laboratorio de microbioloxía, a través do Instituto de Investigación Sanitaria Galicia Sur, para o sistema de procesado agrupado de probas de COVID-19 (sistema ‘pooling’), mediante o que se poden analizar 100.000 mostras ao mes.

O presidente da Xunta, Alberto Núñez Feijóo, acompañado polo conselleiro de Sanidade, Julio García Comesaña, e o xerente da área, Javier Ponte, así como outros responsables do Sergas, visitou este venres as instalacións, cuxas obras finalizaron esta semana.

O actual laboratorio permite integrar nun único espazo todos os equipos para realizar o procesamento de probas, xa que ata agora o módulo preanalítico atopábase nunha sala diferente, o que dificultaba o proceso.

O sistema de procesamento agrupado de probas conta con diferentes equipamentos: un módulo para clasificar e rexistrar a entrada de mostras, dous robots pipeteadores que agrupan 20 mostras nun tubo, dous equipos de extracción que realizan a PCR, e tres módulos termocicladores que ofrecen o resultado final.

O procesamento agrupado de mostras permite aforrar tempo e custos, multiplicando a capacidade de avaliación, xa que analiza as probas en grupos de 20, de modo que se o resultado global é negativo, todas as mostras son negativas. No caso de que sexa positivo, as mostras poden volver fraccionarse ou analizarse unha por unha.

Outra das vantaxes é que permite detectar precozmente a circulación da COVID-19, xa que se están facendo probas en procura de pacientes asintomáticos (persoal sanitario e sociosanitario), o que permite controlar máis eficazmente a posible aparición de brotes.

PROBAS A SANITARIOS E PERSOAL DE RESIDENCIAS

O conselleiro de Sanidade, Julio García Comesaña, confirmou que “as probas van francamente ben” e que, xa hai semanas que se están realizando entre persoal hospitalario e de Atención Primaria. “Agora imos estender o sistema a 15.000 traballadores de residencias de toda Galicia“, lembrou.

O sistema ‘pooling’ implantouse coa realización de probas a traballadores de áreas críticas do Hospital Álvaro Cunqueiro e estendeuse a usuarios e traballadores de residencias. Así mesmo, empezáronse as probas a persoal de Atención Primaria e a traballadores de certos colectivos laborais, como do Porto de Vigo ou de sectores industriais (automoción e metal).

O laboratorio de microbioloxía de Vigo ten capacidade para procesar 100.000 PCR cada mes, e priorízase o cribado quincenal dos 7.000 traballadores sanitarios da área (14.000 mostras ao mes), e o cribado quincenal dos traballadores de residencias sociosanitarias (30.000 mostras ao mes). O resto de probas procesadas (unhas 56.000 ao mes) correspóndense con cribados a colectivos laborais do sector industrial.

Aínda que inicialmente as probas facíanse recollendo unha mostra nasofarínxea, agora fanse a partir de mostras de saliva. Ademais, o persoal conta cun sistema de autorrexistro, a través dunha aplicación móbil, onde aparecen de forma automática os resultados das análises.