Continúa o avance da covid-19 nos centros galegos. A poucos días de que arrincara o período lectivo de primaria e infantil son xa un total de 161 casos, unha circunstancia, que, ata o momento, obrigou a decretar o peche dun total de 35 aulas. Polo de agora, Galicia tan só rexistrou un caso de peche total: o do colexio Calasancio de Pontevedra, que vén de reabrir “con total normalidade” días despois de detectar 8 positivos entre o persoal.

Os casos de covid en tempo real nos centros galegos poden ser consultados neste mapa en tempo real.

Os casos de COVID-19 nas gardarías e nos centros galegos multiplícanse. Este martes, a Xunta cuantifica practicamente o dobre de positivos respecto deste sábado, data na que se difundiu o primeiro balance detallado por centros desde o inicio do curso e que xa ascende a un total de 161 casos con 35 unidades pechadas.

A diferenza entre os contaxios representa uns 65 máis que os informados este fin de semana polo Goberno galego, un incremento que se produce a pesar de reactivarse aulas en polo menos seis escolas (o que levou a varios centros a desaparecer da táboa de reconto) e da reapertura do colexio plurilingüe Calasancio de Pontevedra.

O avance do virus nas escolas de infantil e primaria senta un precedente pouco optimista de cara á educación universitaria, que arrinca na xornada deste xoves, e a secundaria, cuxo inicio está previsto para a semana vindeira logo de que a Xunta decidira adiar o regreso ás aulas trala negativa do múltiples centros a comezar o período lectivo nesas circunstancias.