A dirección da planta viguesa do Grupo PSA Peugeot Citroën agradeceu o labor dos servizos que evacuaron e atenderon aos empregados da fábrica que viaxaban nun autobús accidentado en Oia este martes e resultaron feridos.
Así as cousas, a dirección da planta de Balaídos puxo en valor o “inestimable labor e coordinación de todos os servizos implicados na evacuación e atención aos feridos do accidente de autobús”.
Por iso, transmitiu o seu recoñecemento á “rápida e eficaz actuación” dos servizos desprazados ata a zona, así como a dos profesionais dos centros hospitalarios nos que se atendeu ás vítimas, ás que desexou unha pronta e favorable recuperación.
Así mesmo, a dirección da fábrica viguesa explicou que “os responsables do Servizo de Prevención e Saúde da planta mantivéronse en contacto cos empregados implicados neste accidente desde o primeiro momento”. Ademais, sinalou que “permanecen á súa disposición para atender as necesidades que puidesen requirir”.
O suceso tivo lugar pouco antes das 23,00 horas deste martes cando un cabalo invadiu a calzada na estrada PO-552, que une Vigo coa Guarda. O condutor do autobús, da empresa ATSA, tratou de esquivalo sen éxito, e terminou atropelándoo, o que provocou que o vehículo envorcase.
No vehículo viaxaban unha trintena de traballadores da planta viguesa de PSA, quen regresaban aos seus domicilios tras terminar a xornada laboral. Como consecuencia, foron trasladadas a varios hospitais un total de 22 persoas das que a maior parte xa recibiu o alta.
