O alcalde de Vigo, Abel Caballero, destacou este mércores que a ocupación hoteleira na primeira semana de agosto elevouse ata o 68% na cidade, unha cifra “non desdeñable” dadas as dificultades xeradas pola pandemia de coronavirus, aínda que recoñeceu que non son niveis “óptimos” e están por baixo dos rexistrados o pasado verán.

Nunha rolda de prensa, o rexedor olívico detallou datos de ocupación hoteleira na cidade nas últimas semanas, e sinalou que, na primeira semana de xullo, esa ocupación estaba no 31%, mentres que na segunda semana subiu ao 44%, ao 48% na terceira e logo ao 60%. A ocupación media nos fins de semana do mes pasado foi do 65%.

Segundo Abel Caballero, o nivel de ocupación de establecementos hoteleiros de Vigo alcanzou o 68% na primeira semana de agosto e aventurou que a cifra referida a os fins de semana deste mes pode chegar ao 80%.

O rexedor admitiu que non é a ocupación “óptima” pero si “razoable” dadas as circunstancias, e comparou a media de ocupación hoteleira de Vigo no mes de xullo, do 47%, coa doutras cidades, como Granada ou Valencia, que roldou o 40%.