As Técnicas en Coidados Auxiliares de Enfermaría (TCAE) do hospital Álvaro Cunqueiro de Vigo secundaron a primeira das catro xornadas de folga convocada pola comisión de centro para rexeitar a obriga de trasladar as roupas da bolsa sucia, función que até o de agora asumía a empresa concesionaria.

Pero mentres que a comisión de centro cifra nun 80% o seguimento do paro, a Xerencia da EOXI rebaixa a cifra até o 48%. Todo a pesar dos servizos mínimos, que as folgistas consideran abusivos, posto que nalgúns casos chegan a superar ás dotacións dun domingo ou festivo.

Pola súa banda, desde a CIG consideran que as TCAE “veñen de demostrar na xornada de hoxe a forza que teñen, deixando moi claro que o conflito, lonxe de estar superado, sitúase no momento máis duro con catro xornadas de folga convocadas (18, 21, 25 e 28 de xuño)”.

Denuncian que a día de hoxe a Xerencia “segue sen aportar solucións e intenta descargar a responsabilidade sobre as traballadoras, demostrando a súa nula capacidade de actuación nesta cuestión, xa que con este modelo a concesionaria ten secuestrado o hospital”.

Nesta situación, tras reclamar comisión de de centro a implicación do conselleiro mediante unha petición de xuntanza por escrito, “obtivemos o silencio por resposta”. Finalmente adiantan que as integrantes do colectivo afectado, lonxe de baixar o ton das protestas, “están dispostas a intensificar as mobilizacións e levalas até onde faga falta”.