As 200 prazas da primeira das rutas que organiza a Deputación de Pontevedra para este verán, que transcorrerá polos Muíños da Fraga, en Moaña, quedaron esgotadas en apenas 24 horas. Ademais, encheuse a lista de espera.

O primeiro itinerario da quinta edición do programa ‘Depoandainas’ de 2020, para o que xa non quedan prazas libres, será o vindeiro domingo 9 de agosto e consistirá nun percorrido circular de 9,7 quilómetros cunha dificultade media.

Debido ás medidas de seguridade derivadas da COVID-19, os participantes deberán desprazarse ata o punto de partida da ruta, onde se lles asignará un monitor e serán repartidos en grupos de ata 25 persoas.

Ademais desta camiñada no termo municipal de Moaña, as ‘Depoandainas’ da Deputación ofrecerá este verán outros dous percorridos, dirixidos a 200 persoas de todas as idades. En concreto, serán pola Fervenza de Callobre, na Estrada –o 30 de agosto–, e polo Val das Fadas, na Cañiza –o 20 de setembro–.