A Xunta entregou esta semana máis de 76.870 novas unidades de material de protección destinadas a campamentos infantís programados polo Goberno galego e centros de día de iniciativa social da área de Vigo co obxectivo de reforzar a súa seguridade.

A través dun comunicado, o Executivo autonómico detallou que o envío, destinado a 77 centros, estivo composto por 44.300 luvas, 31.978 máscaras, 154 batas e 66 pantallas de protección e distintos produtos de desinfección.

CASE UN MILLÓN DE UNIDADES

Deste xeito, o volume de unidades entregadas desde o inicio da propagación da pandemia a 128 centros sociais da área territorial de Vigo ascenderon a 963.905. Así, enviáronse 479.790 luvas, 408.620 máscaras, 20.918 traxes e batas, 55.877 pantallas, gorros e calzas e 5.359 unidades de produtos de desinfección e limpeza.

En concreto, este material foi proporcionado a centros de atención á discapacidade, igualdade, inclusión, de maiores, menores e mocidade, así como ao Centro de Educación Ambiental O Kirico de Fornelos de Montes (Pontevedra), que acollerá campamentos de verán desde o próximo 19 de xullo.