A Comisión Europea urxiu este xoves a España a completar a designación de 345 zonas de especial conservación ( ZEC) situadas nos Pireneos, o Mediterráneo e o Atlántico que aínda non contan con este nivel de protección a pesar de que deberían telo por pertencer á rede Natura 2000.

Bruxelas enviou unha nova carta a España no marco do procedemento de infracción que abriu en 2015. En concreto, pide ás autoridades nacionais que designen como ZEC todas os Lugares de Importancia Comunitaria (LIC) que aínda non contan con esta cualificación.

O Executivo comunitario especificou nun comunicado que aínda quedan por designar como Zonas de Especial Conservación un total de 345 áreas dos 1.278 Lugares de Importancia Comunitaria do país. “Ademais, a Comisión opina que houbo unha práctica xeral e persistente por parte de doce comunidades autónomas e a nivel central na cal non se detallaron e cuantificaron suficientemente nin os obxectivos de conservación nin as medidas de conservación necesarias“, engadiron as autoridades europeas.

Con este novo aviso, Bruxelas dá dous meses a España para “remediar a situación ou, pola contra, podería dar o seguinte paso no expediente sancionador, que en última instancia podería acabar no Tribunal de Xustiza da UE ( TUE).