O conselleiro de Cultura e Turismo, Román Rodríguez, chamou a apoiar a cultura para fomentar a súa reactivación e asegurou que a literatura foi “protagonista” en Vigo no marco da inauguración da Feira do Libro que acollerá esta cidade ata o vindeiro sábado, 4 de xullo.

Román Rodríguez afirmou que este evento ofrece unha actividade “á altura do sector editorial galego” e incidiu en que se adaptou á situación actual para garantir a seguridade sanitaria.

No entanto, incidiu na necesidade de que os cidadáns actúen con sensatez e “non baixen a garda”. Ademais, chamou a “devolver” aos profesionais e creadores do ámbito literario “o moito que deron durante o confinamento” e remarcou que este é un momento para apoiar a cultura autóctona e favorecer a súa reactivación.

Nesta liña, o titular autonómico de Cultura recoñeceu o “enorme esforzo, rigor e rapidez” da Federación de Librarías de Galicia para pór en marcha as feiras do libro, suspendidas durante a pandemia, e resaltou que esta cita reunirá en Vigo a uns 50 autores que asinarán exemplares en cálea Príncipe.

Ademais, o conselleiro de Cultura puxo en valor a relación da cidade coa literatura “desde que en 1863 imprimiuse ‘Cantares galegos’ de Rosalía de Castro ata que se impulsou o ‘boom’ da novela negra”. De feito, lembrou que esta representa “un subxénero recoñecido” na actualidade que conta con miles de lectores.

En concreto, a edición número 46 da Feira do Libro de Vigo, apoiada pola Xunta, contará con espazos das librarías viguesas Librouro, Cortizas, Nobel Gran Vía, Pedreira, Hobbit e A Gata Tola, así como do Centro de Documentación Feminista de Vigo e a Biblioteca Neira Vilas.

Posteriormente, o evento percorrerá Ponteareas (do 9 ao 12 de xullo), Redondela, (do 16 ao 19 de xullo) e Rianxo (do 23 ao 26 de xullo), ademais da Coruña (do 1 ao 10 de agosto), Foz (do 20 ao 23 de agosto) e Monforte de Lemos (do 26 ao 29 de agosto). Finalmente, Ourense pechará a cita anual entre o 9 e o 12 de outubro.