O Concello de Vigo derrubará o edificio que albergaba a cafetaría ‘Camaleón’, en pleno paseo da praia de Samil, e cuxa concesión finalizou, para converter esa área en zona verde.

Así o confirmou o rexedor, Abel Caballero, nunha rolda de prensa, na que explicou que a administración municipal recepcionou ese espazo a mediados de xaneiro, tras finalizar unha concesión de 35 anos outorgada a mediados dos anos 80.

“Tomei a decisión de que se faga unha zona verde”, anunciou, e confirmou que o “esperpento” de edificio da cafetaría será demolido, do mesmo xeito que se fixo no seu día co restaurante-cafetaría As Dornas, tamén no paseo do emblemático areal vigués.