O Eixo Atlántico expuxo a creación dunha comisión de prevención epidemiolóxica que analice a evolución da pandemia da COVID-19 na Eurorrexión Galicia-Norte de Portugal.

Segundo trasladou nun comunicado, tamén se busca que o grupo de traballo estableza sistemas de alerta conxuntos ante posibles futuras crises sanitarias.

Esta iniciativa enmárcase nun documento transmitido polo Eixo Atlántico ao presidente da Xunta e a Comunidade de Traballo Galicia-Norte de Portugal, Alberto Núñez Feijóo, no que se detallan medidas urxentes para combater a crise económica derivada da pandemia na Eurorrexión Galicia Norte de Portugal.

En concreto, estas propostas buscan favorecer a creación de emprego mediante un impulso da actividade económica. Para iso, expúxose potenciar o Camiño de Santiago e a produción e a comercialización de produtos tradicionais da Eurorrexión. De feito, propúxose compartir a Feira de Produtos Tradicionais do Eixo Atlántico que se celebra anualmente no Barco de Valdeorras (Ourense) e que pasará a ser itinerante.

Tamén se puxo a disposición das institucións e entidades ligadas ao turismo a feira de turismo de proximidade do Eixo Atlántico, Expocidades, que celebrará a súa próxima edición en Valongo (Portugal).

Así mesmo, remarcouse a importancia de acometer infraestruturas pendentes, como o saída sur de Vigo e o desenvolvemento dunha liña de altas prestacións entre Ferrol e Lisboa. Tamén se destacou a relevancia da construción do Corredor Atlántico de mercadorías e demandouse que se dote ás cidades galegas que dispoñen de aeroportos de lanzadeiras que os conecten coas súas estacións de tren.

SERVIZOS DIXITAIS

O documento apostou polo reforzo de redes e servizos dixitais e a coordinación de centros tecnolóxicos e de investigación de ambas as rexións “para xerar unha estrutura sólida” que fomente a competitividade das empresas. Ademais, defendeuse a necesidade do desenvolvemento dun plan de recuperación do talento para persoas emigradas e de retención do mesmo.

Adicionalmente, propúxose a creación dunha comisión conxunta por parte das entidades públicas para impulsar a contratación de artistas e creadores.

Do mesmo xeito, avogouse por establecer unha programación coordinada e unha xestión complementaria de fondos europeos consignados para o período 2021-2027. Así, sinalouse que estas propostas deben remitirse de modo urxente á Comisión Europea ante a previsión de que a aprobación dos regulamentos e orzamentos dese período leve a cabo este ano.

Así mesmo, o Eixo Atlántico expuxo a necesidade da aprobación de “un novo tratado bilateral que dea cobertura a figuras como as eurociudades” e criticou a falta de cooperación entre institucións públicas e entidades privadas de Galicia e Portugal.