O alcalde de Vigo, Abel Caballero, afirmou que “todas” as máscaras distribuídas pola Xunta foron adquiridas polo Executivo central, tras o que, segundo asegurou, a Administración autonómica “lles quitou a etiqueta do Goberno e as entregou”.
Así se pronunciou durante unha comparecencia realizada este xoves de modo telemático na que volveu denunciar que o Executivo que preside Alberto Núñez Feijóo “entregou 15.000 máscaras caducadas desde 2014”, en referencia ao primeiro envío destinado á cidade. Precisamente, o Goberno galego defendeu en varias ocasións que este material de protección contaba coas garantías esixidas polo Ministerio de Sanidade para a súa distribución.
Tras explicar que o goberno local repartirá 30.000 máscaras “de modo inmediato” ás que o vindeiro luns se engadirán outras 20.000 “compradas polo Concello e que veñen do Goberno”, lamentou que “segue esperando polas da Xunta”.
Así mesmo, o Executivo que preside Alberto Núñez Feijóo asegurou que as acusacións do rexedor olívico sobre a etiquetaxe das máscaras entregadas son “falsas”.
Nesta liña, lembrou que, a pesar de que o Goberno Central asegurou que asumiría a compra de material de protección, centralizándoo, “9 de cada 10 unidades utilizadas polo Goberno galego” foron adquiridas pola Administración autonómica.
Do mesmo xeito, sinalou que, ata este momento, foron enviadas aos catorce municipios da área olívica 195.821 unidades de material de protección. En concreto, detallou que se entregaron 114.580 luvas, 77.640 máscaras e 2.684 traxes antisalpicaduras e batas, ademais doutros produtos desinfectantes.
A ese respecto, precisou que 114.548 destas unidades se destinaron a servizos municipais do Concello olívico, polo que sinalou que “a manifestación do alcalde vigués nese sentido é igualmente falsa”. Nesta liña, instou a Abel Caballero a “manter a lealdade institucional que se require”, así como a que “bote unha man” e “deixe de torpedear” o traballo das administracións que “están á altura das circunstancias”.
