O Concello de Vigo abre este sábado, día 2 de maio, os areais da cidade para que a xente que vive nun espazo de menos dun quilómetro deles poida pasear por estas zonas. “Só pasear, non se pode utilizar nin para estar tombados nin para o baño se viñese o bo tempo”, subliñou o alcalde, Abel Caballero, nunhas declaracións difundidas aos medios.
Na súa intervención, chamou aos veciños a respectar o sistema de franxas que entra en vigor este sábado. “Segue sendo un paseo nun quilómetro á redonda do domicilio”, incidiu.
Ademais, destacou o “bo funcionamento”, comprobado este venres, do sistema de peonalización de rúas durante os días festivos e os domingos. Os coches que tiveron que circular polas zonas peonalizadas para entrar nos aparcadoiros fixérono á velocidade ordenada, 10 quilómetros por hora”, sinalou.
O rexedor explicou que, aínda que debido ao mal tempo non saíu moita xente á rúa, o Consistorio comprobou que “o sistema funciona moi ben” e que as rúas están dispoñibles. “Pódese utilizar como un bo sistema de funcionamento”, manifestou.
