Así o explicou esta mañá aos micros da TVG Susana Otero, veciña de Sabarís que descubriu que tiña o virus un mes despois de terse contaxiado, pasando a enfermidade cunha sintomatoloxía leve.
“Máis ou menos sobre o 20 de marzo un compañeiro meu deu positivo. Eu chamei porque me doía a cabeza e tiña catarro. Sobre todo quería sabelo porque teño un fillo que é diabético. Cando chamei dixéranme que non, que tiña febre que non facía falta facer o test. Unha semana despois volvín a chamar para dicirlles que estaba preocupada. Insistiron en que non. Uns 25 días máis tarde contactei coa miñá médica de cabeceira. Ela mandoume facer a proba e dei positivo. Xa pasara case un mes desde o contaxio”.
“Durante ese mes eu mantiven a miña vida de traballo, mantendo precaucións. Tamén convivín coa miña familia con normalidade. A eles tamén lles doía un pouco a cabeza, pero nada máis. Tiveron que pasar o virus todos eles tamén”.
