Axentes da Policía Local de Vigo identificaron e incoaron dilixencias de denuncia contra catro mozos que foron sorprendidos despois de achandar unha vivenda na cidade, e que argumentaron que entraran porque estaba deshabitada, e ían preparar “un churrasco”.

Segundo informaron fontes policiais, os feitos tiveron lugar na tarde do pasado venres, cando o dono dunha propiedade na zona de Castrelos chamou á Policía, tras ser alertado por un veciño de que varios mozos entraran na casa.

Ata o lugar desprazouse unha dotación do 092, que comprobou que, no interior da propiedade se atopaban 4 mozos e dous cans, xunto a un braseiro. Ao ser preguntados se eran donos ou familiares dos donos da casa, estes alegaron que se atopaba aberta, que non vivía ninguén, e que entraran o día anterior.

Os axentes, no entanto, puideron comprobar que as portas do baixo estaban apalancadas, e unha delas, rota; tamén constataron que había unha xanela desmontada, e que todas estaban abertas.

Os mozos aseguraron que as portas da propiedade estaban abertas cando chegaron, e que unicamente abriran as xanelas para “ventilar”. Así mesmo, explicaron que o braseiro era para preparar un churrasco.

Con todo, o propietario confirmou á Policía que o baixo estaba pechado cun cadeado, e que tamén estaba completamente pechado o resto da propiedade. O home contactou cun albanel para tomar medidas e pechar de novo a casa, á vez que foi informado pola Policía das dilixencias de denuncia que tiña que cumprimentar.