A residencia DomusVI Barreiro, en Vigo, é o maior foco de coronavirus neste tipo de centros en Galicia. En total hai 35 contaxiados, 30 maiores e cinco traballadores.
O número de casos positivos por coronavirus en residencias de maiores galegas ascendeu nas últimas horas ata os 97 casos, 76 usuarios destes centros e 21 traballadores dos mesmos.
Así o confirmou a Consellería de Política Social este mércores a Europa Press. O último dato sobre residencias anunciado polo presidente da Xunta, Alberto Núñez Feijóo, na pasada xornada cifraba en 57 os casos positivos de persoas maiores ou dependentes, con todo nas últimas horas sumáronse 20 máis a esta cifra.
O maior número de residentes infectados atópase na Domus V Barreiro de Vigo, con 30 casos positivos (12 máis que en onte); despois contabilizáronse 13 na residencia San Carlos de Celanova (Ourense); 13 na Domus V San Lázaro de Santiago (dous máis que onte); nove na Residencia O Portazgo da Coruña (un máis); catro na Domus V de Cangas (tres máis) e apareceu un novo caso no centro de Castro Caldelas (Ourense).
Noutras mantense o número de afectados da pasada xornada: tres na Fogar Bellolar da Coruña; dous na nosa Señora de Fátima no Barco (Ourense) e un na nosa Señora da Asunción en Caldas de Reis (Pontevedra). Por outra banda, tamén se contabilizaron os traballadores que prestan servizo nestas residencias e que padecen o virus. En total hai 21 empregados afectados, 14 deles na San Carlos de Celanova, 5 na Domus V Barreiro de Vigo, 1 na residencia A Esperanza San Rosendo (Ourense) e un da San Simón de Teo (A Coruña).
