O reitor da Universidade de Vigo, Manuel Reigosa, fixo un chamamento á “concienciación” sobre a “seriedade” da situación xerada pola expansión do coronavirus, tras confirmarse os dous primeiros positivos en Covid-19 no seo da comunidade universitaria viguesa: un profesor da Escola de Enxeñaría de Telecomunicacións de Vigo e unha alumna de Dereito do campus de Ourense.

A través dun comunicado publicado nas últimas horas na web da Universidade, Reigosa expresou a súa “confianza de que, máis cedo que tarde”, estes afectados estarán “curados”, e pediu que estes dous casos sirvan ao resto da comunidade universitaria “para tomar conciencia do serio da situación”.

O reitor da institución académica viguesa trasladou ao resto de profesores, persoal administrativo, e alumnos que, para reverter a situación, “é imprescindible” que queden “en casa”, salvo casos realmente xustificados, e “tomando todas as precaucións aconselladas”. Ao profesor e ás alumnas afectados, transmitiulles o “agarimo” da comunidade universitaria.