“Os cidadáns e cidadás de Vigo esiximos o cese inmediato da actividade laboral na planta de PSA Citroën Vigo por motivos de saúde pública”. Desta maneira comeza o texto que acompaña a solicitude de firmas a prol do peche da fábrica na plataforma change.org. No escaso tempo que leva aberta a petición, as sinaturas xa superan as 10.000.
E é que a empresa PSA en Vigo reiterou este mesmo domingo, 15 de marzo, a súa decisión de manter a actividade a pesar da emerxencia sanitaria na que se atopa todo o estado debido á expansión do coronavirus.
Tamén os sindicatos (CUT) pediron estes días a paralización total da produción da planta nun escrito remitido á propia empresa no que argumentaba que unha actividade con miles de contactos entre os seus traballadores é “un posible foco de propagación” do coronavirus. Por este mesmo motivo, solicitaban “non correr o risco” de primar “a produción por encima da saúde”.
No texto da recollida de firmas asegúrase, ademais, que a actividade laboral da planta non só pon en risco ao persoal senón tamén ás súas familias, e por extensión, a toda a cidadanía. Os traballadores e traballadoras acuden á fábrica dende a propia cidade de Vigo e tamén dende outros municipios achegados, de maneira que a mobilidade pode contribuír ao contaxio deste virus.
Os propios traballadores tamén expresaron o seu malestar por esta decisión a través das redes. “O diñeiro que perda a empresa nunca pode estar por enriba da vida e da saúde”, explicaba un empregado dunha das empresas auxiliares de Citroën nun vídeo compartido polas redes sociais. “Eu non son un sector de primeira necesidade”.
POSICIÓN DA EMPRESA
A pesar de todas estas demandas, fontes da dirección de Citroën Vigo ampáranse en que a declaración do estado de alarma por parte do Goberno “autoriza a continuidade da actividade industrial e os movementos das persoas para acudir ao traballo”. PSA asegurou tamén que “intensifica a actividade preventiva” a través de “medidas destinadas a asegurar o distanciamento social recomendado” entre os empregados.
Estas solucións, que se concretarán este domingo nunha reunión co comité de empresa, súmanse a outras xa implantadas como o “reforzamento” da limpeza, a “prohibición de viaxes”, os protocolos “para evitar que entren persoas que estivesen en zonas de risco”, ademais doutras recomendacións que “minimicen o risco de contaxio”.
Xa o venres, a dirección da planta de PSA en Vigo propuxo que os empregados poidan utilizar bolsas de horas ou permisos retribuídos, traballar a distancia para coidar os seus fillos ante a suspensión das clases e “todos os mecanismos de flexibilidade dispoñibles”.
XUNTA DE GALICIA
A Xunta, pola súa banda, tamén considera “prioritario” manter activa a industria. Así pois, insiste en que o funcionamento do sector secundario e primario debe “manterse sempre” coa seguridade de que os empregados das empresas traballan amparados por medidas de prevención para evitar contaxios de coronavirus que contribúan á súa expansión.
