O conselleiro de Economía, Emprego e Industria, Francisco Conde, considera “prioritario” manter a actividade industrial “con todas as garantías” para asegurar a saúde dos traballadores. Unha visión completamente oposta a dos sindicatos de grandes empresas como PSA-Citröen que entende que a saúde dos traballadores está en risco por acudir a traballar.
A Xunta insiste en que o funcionamento do sector secundario e primario debe “manterse sempre” coa seguridade de que os empregados das empresas traballan amparados por medidas de prevención para evitar contaxios de coronavirus que contribúan á súa expansión, o que obrigou a declarar o estado de alarma en todo o Estado.
Nunha entrevista na Cadena Ser, o conselleiro de Economía apelou ao “diálogo social” como unha “clave” para evitar regulacións de emprego. Cre que os axentes sociais e patronal deben estar en contacto e establecer mecanismos para “atenuar o impacto da situación actual” a través do teletraballo, a flexibilidade horaria, a conciliación e mesmo vacacións. A isto suma a “reorganización de quenda” que “moitos empresarios” están a introducir.
CRÍTICAS
Unha postura moi diferente é a que manteñen os sindicatos, principalmente, aqueles das grandes industrias. Así, tanto a CIG como a CUT piden que cancele tamén a actividade industrial para evitar riscos para a saúde dos traballadores.
“Estamos a falar dunha situación de alarma decretada polo Goberno no que hai que cumprir uns mínimos. A maioría dos galegos está na casa para evitar a propagación dese virus e o que non pode ser é que se lle permita a grandes centros de traballo, como PSA-Citröen que incumpra a normativa”, apunta José Manuel Domínguez, da CIG. “Todos temos que poñer da nosa parte para evitar a súa propagación e non pode ser que empresas como esta non o faga”, engade.
Pola súa banda, Roberto Castro, da CUT sinala que hai que pechar a produción durante quince días para garantir a seguridade que piden desde o Estado. “A empresa puxo como solución retardos nas entradas e saídas e con iso xa pensa que cumpre. Teñen que intervir as administracións públicas que subvencionan con moitos cartos a estas empresas”, advirte.
