En Marea denuncia “a insuficiencia das contías” que a Xunta destinará á reconstrución das vivendas de Tui (Pontevedra) após a explosión de pirotecnia rexistrada neste municipio. A formación, a través dun comunicado de prensa, pide “que se reformule o cómputo”, pois “as cantidades que se contemplan para os afectados son insuficientes”.

O grupo parlamentario trasladará ao próximo pleno “a necesidade de mellorar o decreto de axudas“. “Á vista das pequenas e de xeito evidente insuficientes cantidades que o Goberno galego pretende destinar á reconstrución das vivendas destruídas”, advirte.

Así mesmo, a formación manterá unha nova reunión cos damnificados, “para coñecer de primeira man a súa situación e puntos de vista”. Entende En Marea que as axudas deben permitir “afrontar a recuperación do conxunto de elementos que compuñan as vivendas arrasadas, tanto na súa estrutura como no seu contido”.