InicioSociedade"Apoio total" das profesoras da Escola Superior de Arte Dramática ás alumnas...

“Apoio total” das profesoras da Escola Superior de Arte Dramática ás alumnas que denunciaron acoso sexual

Seguirán cos paros ata que Educación "tome cartas no asunto" e os profesores implicados "non sigan na docencia".

PUBLICADO O

- Advertisement -

Alumnas e profesoras da Escola Superior de Arte Dramática (ESAD) de Galicia denunciaron este venres episodios de abuso de poder e de acoso sexual de docentes a varias alumnas do centro, algúns deles sucedidos en cursos anteriores e outros no actual.

Profesoras e alumnas, que esixen que os docentes en cuestión sexan apartados, aínda que sexa temporalmente mentres se clarifique o sucedido, puxeron esta situación en coñecemento da Consellería de Educación.

Fontes da Xunta confirman que dúas inspectoras se entrevistaron co equipo directivo e co alumnado, co que se asumiu o compromiso de facer un seguimento do caso.

Precisamente hoxe celebrouse unha nova reunión co alumnado e representantes da ESAD, na mesma xornada na que as profesoras do centro anunciaron que secundarán os paros convocados por aqueles ata que se aparte do exercicio docente os implicados nos presuntos episodios de abuso e de acoso que foron denunciados.

As profesoras da ESAD leron un comunicado no que trasladan o seu “apoio total” ás alumnas ao obxecto de que o centro sexa “un espazo libre de abuso de poder e de acoso sexual”.

“A ESAD non é só un lugar laboral para nós, que como traballadoras temos o dereito para desenvolver a nosa actividade nun espazo sen violencias machistas; é tamén lugar de convivencia consagrado á formación de artistas e a educación en sentido amplo”, reza o manifesto.

“Como creadoras e como persoas comprometidas para formar mellores persoas, libres, críticas e responsables, consideramos que estas prácticas execrables sucedidas durante o exercicio docente son especialmente vergoñosas“, denuncia tamén o texto lido por unha profesora.

E engade: “O dereito á educación non só implica o acceso ao saber, senón tamén a aprendizaxe nos valores de liberdade, igualdade e respecto polo dereito das mulleres en calquera espazo da nosa sociedade”.

Unha portavoz das profesoras da ESAD sinalou que non teñen un “coñecemento profundo dos feitos”, pero que saben que “hai casos confirmados con declaracións de alumnas ante a inspección” educativa.

Preguntada por cantos profesores e cantas alumnas estarían involucradas nos feitos denunciados, recoñeceu que descoñecen este extremo, máis aló de que son “varias” as presuntas vítimas de “comportamentos, que exceden a comentarios. Falamos de violencia exercida sobre as mulleres que estudan aquí”, dixo a portavoz.

Tamén recalcou que non se trata dun “episodio puntual”, senón de feitos reiterados no tempo.

Unha portavoz das alumnas da ESAD asegurou que seguirán cos paros ata que Educación “tome cartas no asunto” e que os profesores implicados “non sigan na docencia”.

ÚLTIMAS

De Baiona a Bruxelas: a iniciativa cidadá que cambiará a seguridade infantil nos coches europeos

Pedro Telmo, veciño de Baiona, impulsou unha campaña en Change.org que superou as 62.500...

O BNG esixe cambiar o plan de tráfico do Nadal de Vigo tras o “caos” do acendido das luces e o desfile de Disney+

O BNG de Vigo urxiu ao Goberno municipal que "rectifique" o plan de tráfico...

“Ameaza a supervivencia do barrio”: Lavadores mobilízase contra o proxecto de vivendas da Xunta

Máis de mil veciños do barrio vigués de Lavadores asinaron unha carta dirixida ao...

O histórico Teatro Fraga de Vigo volverá á vida: case 20 millóns de euros para unha reforma que comezará en 2027

O Consello da Xunta autorizou este luns a licitación das obras de restauración do...