A Universidade de Vigo (UVigo) incrementou en 2018, o último ano do que se dispoñen informes, as súas emisións de C02, que ascenderon a 27.081 toneladas, unha cifra superior á rexistrada o ano anterior.
Segundo detallou a universidade nun comunicado, a pegada de carbono, que reflicte os gases de efecto invernadoiro emitidos de modo directo ou indirecto, situouse en 1,19 toneladas de CO2 equivalente por persoa fronte ás 0,97 acumuladas en 2017, cando xa se rexistrou un ascenso.
A universidade achacou este incremento á posta en marcha de novas instalacións, como o Centro de Investigacións Biomédicas (Cinbio) e o Centro de Apoio Científico e Tecnolóxico á Innovación (Cacti), así como a que en 2016 se produciu un cambio dos factores de emisión empregados que tende a aumentar os resultados das emisións de CO2 asociadas a distintas variables.
En concreto, a pegada ecolóxica da universidade en 2018 ascendeu a 9.091 hectáreas globais equivalentes, 0,40 por persoa, xa que a institución educativa sumou 22.710 estudantes ese ano. Ademais, os campus contan con 79 hectáreas de bosque cuxa capacidade de absorción de CO2 en 2018 se estimou en 342 hectáreas globais (gha) equivalentes, o que derivou nun déficit de 0,015 gha por persoa.
Así, o campus de Vigo xerou o 70,9 por cento das emisións da universidade, unha situación que se relaciona co feito de que alberga o 57,89 por cento dos estudantes, así como distintos centros de investigación que implican un maior gasto de recursos e unha maior xeración de residuos que os doutras disciplinas.
Ademais, o estudo realizado mostrou que a principal actividade xeradora de dióxido de carbono na universidade correspóndese coa mobilidade, xa que esta representa o 56,7 por cento das emisións. Así, xera o 70,9 por cento do CO2 vertido desde o campus de Vigo fronte ao 0,78 por cento acumulado en Ourense e un 0,88 por cento emitido en Pontevedra.
Mentres, o consumo de enerxía eléctrica supuxo un 16,72 por cento das emisións de dióxido de carbono da universidade. Así, representou un 17 por cento do CO2 xerado en Vigo, un 20 por cento do emitido en Ourense e un 11 por cento do de Pontevedra. A construción, pola súa banda, representou un 15 por cento do CO2 vertido desde a universidade.
