O conselleiro de Sanidade, Jesús Vázquez Almuiña, considera que tanto o Servizo Galego de Saúde (Sergas) como o Sistema Nacional de Saúde ( SNS) están “preparados” para “utilizar os medios que ten” dispoñibles se se rexistra algún outro caso de coronavirus en España. Por agora, o único contaxiado no país é un cidadán alemán que permanece ingresado no Hospital da Gomera (Canarias).
En declaracións aos medios tras participar no Pleno do Consello Interterritorial no Ministerio de Saúde co ministro, Salvador Isla, e os seus homólogos autonómicos, Vázquez Almuiña dixo que hai unha “coordinación total e absoluta” entre as comunidades e celebrou os “criterios uniformes” entre todas elas para facer fronte a esta enfermidade orixinada na cidade chinesa de Wuhan.
Esta reunión en Madrid, en palabras do titular de Sanidade, foi “moi produtiva” e permitiu aos asistentes “avaliar todos os protocolos” en vigor. Ademais, sinalou que estes protocolos “evolucionan” segundo cal é a situación do virus: “Estamos en contacto coa Organización Mundial da Saúde (OMS) para tratar de ver se hai algunha variación no contaxio a nivel internacional para poder adaptar o protocolo”.
Neste sentido, Vázquez Almuiña garante que todas as comunidades están “en condicións” de cumprir os protocolos actuais, que se reevaluarán “continuamente” en función de “todo o que está a pasar”. Por iso, tal e como explicou o conselleiro, as autonomías pediron ao Ministerio que informe “en tempo real”.
“En España só hai un caso e parece que está moi controlado, por tanto (estamos) preparados e expectantes. Neste momento aínda non se pode dicir se está a declinar a epidemia, pero o máis importante é estar en tempo real”, reiterou.
Así as cousas, o conselleiro de Sanidade valorou a reunión deste martes como “un traballo magnífico de coordinación”, todo “un exemplo a seguir” para futuros Consellos Interterritoriais nos que se aborden temas como recursos humanos, financiamento ou desabastecemento de medicamentos, segundo enumerou. “Creo que pode ser un inicio prometedor”, sentenciou.
