Catro persoas foron trasladadas ao Hospial Álvaro Cunqueiro na mañá deste domingo despois de sufrir varios síntomas de intoxicación por mor da mala combustión dun quentador dunha vivenda en Vigo.
Os feitos producíronse preto das 09,30 horas da mañá deste domingo, cando o mal funcionamento dun quentador dunha vivenda situada na rúa de Gandarón provocou a intoxicación dos ocupantes da casa por monóxido de carbono.
Foi un dos afectados o que chamou ao 112 Galicia e informou de que “ao levantarse esta mañá se atopaba mal” e que durante a noite “o quentador non fixera boa combustión”, relatou aos traballadores do Centro Integrado de Atención ás Emerxencias.
Por este motivo, o 112 solicitou a intervención de Urxencias Sanitarias de Galicia, a Policía Local, os Bombeiros de Vigo e a empresa subministradora de gas. Unha vez alí, os servizos sanitarios atenderon as persoas afectadas e trasladáronas ao hospital de referencia.
Ao mesmo tempo os membros do servizo de Prevención, Extinción de Incendios e Salvamento presentáronse no lugar e ocupáronse da ventilación da casa afectada.
