As condicións meteorolóxicas de baixa visibilidade no Aeroporto de Vigo obrigaron na mañá deste martes a desviar a Santiago dous avións e a cancelar outro, todos eles coas súas respectivas voltas. O aeroporto volveu a operar con normalidade sobre as 12,00 horas.

En concreto, desviouse un voo de Iberia procedente de Madrid e outro de Vueling con orixe en Barcelona, que tiveron que aterrar en Lavacolla e efectuar desde este aeroporto a súa saída cara estes mesmos destinos.

En canto á cancelación, trátase dun voo de Air Europa que non chegou a despegar en Madrid. Isto imposibilitou que o avión efectuase a ruta de volta, de forma que tamén tivo que ser cancelada.

Fontes de Aena atribuíron estas incidencias á baixa visibilidade pola néboa de primeira hora da mañá, xa que o sistema ILS –o asistente de aterraxe en caso de néboa– está desactivado desde o día 7 de maio para a súa substitución por un novo.

Os traballos durarán ao redor de oito semanas, e elixiuse os meses de maio e xuño para levalos a cabo por ser nos que “historicamente hai menos días de baixa visibilidade”. Isto supuxo que varios voos se visen afectados nas últimas semanas.