Axentes da Policía Local de Vigo formularon denuncia contra un veciño da cidade, I.E.C., de 23 anos de idade, por circular nun patinete baixo os efectos do alcol.

Segundo fontes policiais, este mozo sufriu un accidente cando conducía ese patinete porque, segundo todos os indicios, invadiu o cruzamento da rúa Pi y Margall con Menéndez Pelayo, saltándose un semáforo. Ao invadir o cruzamento, o usuario do patinete foi golpeado por un turismo que pasaba co semáforo en verde.

O condutor do patín resultou ferido e foi atendido por sanitarios no lugar do accidente, aínda que non necesitou ser trasladado.

Ao entrevistarse con el, os axentes comprobaron que presentaba “claros síntomas” de atoparse baixo os efectos do alcol, polo que os someteron a á proba pertinente, que deu resultado positivo e con relevancia penal (0,70 e 0,74 mg/l).

Así, tramitouse unha denuncia por un delito contra a seguridade viaria. Ademais, a Policía comprobou que o mozo perdera a vixencia do seu carné de conducir.

Por outra banda, a Policía Local de Vigo tamén informou da denuncia contra outra usuaria dun patinete, L.S.C., veciña da cidade e de 23 anos de idade, por unha infracción do regulamento de circulación.

A moza foi sorprendida por unha dotación policial na mañá do sábado na zona de Torrecedeira, cando circulaba polo medio da beirarrúa a “elevada velocidade”.