O grupo municipal Marea de Vigo reclamou este xoves a posta en marcha de protocolos de prevención e actuación en ámbitos de lecer tanto en espazos públicos como privados da cidade, ante a “cifra alarmante” de casos de violencia de xénero.
Así o trasladou en rolda de prensa a concelleira Oriana Méndez, que expuxo a súa preocupación tras coñecerse que, só nos 8 primeiros días de 2020, producíronse xa unha decena de detencións relacionadas con casos de violencia machista.
Do mesmo xeito, lembrou que o Xulgado de Violencia sobre a Muller de Vigo tramitou en 2019 máis 1.000 casos, e apuntou que, a última detención realizada o ano pasado e a primeira deste 2020 foron ambas por supostos casos de violencia de xénero.
Ante esta situación, Marea de Vigo reiterou o seu apoio á demanda da xunta de persoal de funcionarios de Xustiza da provincia de Pontevedra, que reclama a apertura dun segundo Xulgado de Violencia sobre a Muller na cidade, xa que o actual “está sobrecargado”.
Ademais, Méndez volveu a pedir ao goberno municipal que estableza un protocolo contra a violencia machista durante a celebración de eventos e festas en espazos públicos, como na campaña do Nadal, ou no festival O Marisquiño.
Do mesmo xeito, pediu tamén un protocolo “contra o acoso e as agresións” en espazos de lecer nocturno “privados”, como xa existe noutras cidades, o que “esixe un diálogo entre a administración e eses negocios” para “detectar situacións potencialmente perigosas, e poder atendelas de forma rápida e adecuada”.
“Hai que previr, sensibilizar e mellorar a seguridade para as mulleres en contornas festivas, e para iso fan falta estudos e recursos, non só medidas cosméticas”, proclamou Oriana Méndez.
“RESPECTO” POLO ACORDO DE GOBERNO NO ESTADO
Noutra orde de cousas, Marea de Vigo reclamou ao alcalde da cidade e presidente da Federación Española de Municipios e Provincias (FEMP), Abel Caballero, que teña “respecto” polo acordo de goberno asinado entre PSOE e Unidas Podemos, e instouno a cumprir os termos do dito acordo, como responsable do órgano municipalista.
Nunha rolda de prensa, o portavoz de Marea (e secretario de organización de EU en Galicia), Rubén Pérez, lamentou a “falta de respecto absoluta” de Abel Caballero ao referirse a os socios de goberno do seu partido, e aos concelleiros que esas forzas teñen, aos que restou relevancia política.
Rubén Pérez criticou que o rexedor olívico “utiliza unha linguaxe análoga á de Vox”, decidindo “quen é amigo e quen é inimigo da cidade”. “Non imos entrar nesa lameira, pero si dicimos que se houbo alguén que non fixo absolutamente nada porque os concellos tivesen máis autonomía ou porque se derrogase a lei de sustentabilidade da administración local, se houbo alguén que se esqueceu dos compromisos progresistas, foi Abel Caballero”, apuntou.
Ante o acordo de goberno entre PSOE e Unidas Podemos, Rubén Pérez pediu a Caballero que aclare “se está disposto a defender” as medidas que se pactaron: ampliar as competencias e capacidades das administracións locais, garantir o respecto á autonomía local, ou derrogar esa lei do PP que, entre outras cuestións, “consagrou o teito de gasto”.
Esa derrogación, lembrou o portavoz de Marea de Vigo, significaría que os municipios como Vigo poderían ter máis policías, máis bombeiros, máis traballadores sociais e executar as súas partidas, por exemplo, no capítulo de persoal. Rubén Pérez lembrou que o alcalde socialista e o grupo Marea non se teñen que “levar ben” por este acordo, senón que o que lles corresponde é “facer valer” ese pacto político. “E os membros de EU na FEMP vanllo esixir”, apostilou.
