Un proxecto conxunto da Universidade de Vigo (UVigo) e cinco empresas que estuda sistemas de climatización xeotérmicos e a súa posible influencia na difusión do radón, comezou o seu terceiro e último ano de desenvolvemento, que culminará en setembro de 2020.

Segundo trasladou a universidade, na iniciativa, que conta cun orzamento de 820.000 euros financiado con fondos europeos e autonómicos, participan unha vintena de profesionais das empresas Extraco, Megodeza, Galaicontrol, Renga Enerxía e Conexiona xunto a investigadores da UVigo.

Así, o proxecto ‘Geo4radón’, dirixido polo investigador da universidade José Fernández Seara, busca desenvolver bombas de calor máis eficientes para aplicar á calefacción de edificios a partir de enerxía xeotérmica.

Para iso, crearase un sistema unificado que recolla a enerxía obtida e estudarase como recargar os pozos dos que se extraeu mediante aerotermos e forza solar.

Ademais, analizarase a presenza de radon nos pozos dos que se obterá a enerxía e a relación entre as perforacións xeotérmicas realizadas e a difusión deste gas no medioambiente.

En concreto, xa se construíron os campos de captación de enerxía e deseñáronse os sistemas de interconexión, así como os de recarga de pozos, que se situarán nun colector que manterá a súa temperatura. Así mesmo, finalizouse a construción da bomba de calor, que se atopa en fase de probas, e leváronse a cabo medicións relacionadas co control da presenza de radón.