‘La felicidad de los perros’, opera prima do director de cinema vigués David Hernández, estréase en salas este venres 13 de decembro. A película estivo seleccionada en varios festivais, sendo premiada no 56º Festival Internacional de Cinema de Xixón (Premio DCP Deluxe) e na 8ª Primavera do Cinema en Vigo (Premios á mellor longametraxe do xurado e de público).
Poderá verse en Vigo cun pase especial con presenza do director este venres 13 de decembro ás 20:10 e en Santiago, tamén cun pase con presenza do director o 14 de decembro ás 20:00. En Lugo darase un pase único con asistencia do director o 19 de decembro ás 20:45. E en Ferrol farase un pase único con presentación e coloquio a cargo de David Hernández o 20 de decembro ás 19:45.
A primeira longametraxe do cineasta vigués é un drama que ten como protagonista a César, un home en paro, que sente atrapado nun mundo que non lle dá ningunha oportunidade e ante o cal decide cambiar o rumbo da súa vida. O papel principal está encarnado por Fran Paredes, actor moañés, cunha longa traxectoria en teatro e televisión e para o cal é o seu primeiro papel protagonista nunha longametraxe. A repartición complétase cos actores galegos Deborah Vukusic, Isabel Naveira e Santi Prego, recentemente nomeado ao Goya ao actor revelación polo seu papel de Francisco Franco na última cinta de Alejandro Amenábar.
A película rodouse entre Galicia, Zamora, Madrid e Portugal, un proceso de produción que durou ao redor de tres anos desde o inicio dos traballos ata o peche da edición. Trátase dunha produción 100% galega do mesmo xeito que o equipo técnico e creativo, con Adarme Visual á cabeza e coa colaboración da La Panificadora, Y la nave va y Oh Drama!
