Un grupo de investigación do Centro Oceanográfico de Vigo estableceu novos valores de medición do grao de contaminación por hidrocarburos aromáticos policíclicos (PAHs), que poden aparecer dun modo natural no medio mariño, mediante unha clasificación por cores.

Deste xeito, o Grupo de Contaminación estipulou que a cor azul representará o estado óptimo do medio mariño, o verde, o intermedio e o vermello, o preocupante.

En concreto, esta ferramenta permite coñecer a situación natural de certos contaminantes, así como avaliar o seu efecto dun modo máis preciso e definir o momento do cambio da cor que marca o estado de contaminación.

Ademais, esta iniciativa permitirá identificar “os eventos que provoquen unha perturbación do medio” e controlar a efectividade das medidas aplicadas para actuar ante un episodio de contaminación.

Para a obtención dos valores establecidos, os investigadores determinaron 35 PAHs en máis de 100 mostras de sedimentos mariños do Golfo de Cádiz e as rías de Arousa, A Coruña e Pontevedra mediante unha draga.

Adicionalmente, os resultados da investigación levada a cabo polo centro oceanográfico vigués foron recollidos pola revista ‘Ecological Indicators’, mentres que a ferramenta será presentada a nivel internacional.