O Grupo Parlamentario Socialista enviou un escrito á Mesa do Parlamento de Galicia no que rexistra, por erro, a Abel Caballero como novo portavoz parlamentario en lugar da o secretario xeral do PSdeG, Gonzalo Caballero.
No documento remitido á Mesa e asinado dixitalmente polos deputados socialistas, o PSdeG comunica por erro ao alcalde de Vigo como novo portavoz, quen é, á súa vez, tío do xefe de filas dos socialistas galegos.
Fontes socialistas restaron importancia a este fallo e explicaron que se tratou dun “erro humano” que “aos 20 minutos xa estaba solucionado”.
Aínda que durante anos as discrepancias políticas caracterizaron a relación entre o alcalde de Vigo, Abel Caballero, e o seu sobriño, Gonzalo Caballero, na actualidade ambos enterraron estas diferenzas.
O erro non tardou en ser difundido por diferentes cargos do PP a través das redes sociais, como o propio vicepresidente da Xunta e presidente do PP de Pontevedra, Alfonso Rueda.
Ese subconsciente…🤣🤣 pic.twitter.com/dCefxnwlwK
— Alfonso Rueda (@ARueda68) December 2, 2019
O pasado sábado, a executiva do PSdeG abordou o nomeamento de Gonzalo Caballero, como novo portavoz na Cámara galega aínda que manterá a súa axenda como xefe de filas da formación.
