O PP arremeteu contra a Deputación de Pontevedra por usar fondos da administración provincial para “subvencionar accións políticas contra o Concello de Mos”, en concreto o festival ‘Paremos o Pelotazo’.
O evento celebrouse o 16 de novembro na Sala O Rebullón do Centro Social As Pedriñas de Tameiga, organizado pola plataforma “A Auga é Vida”, co obxectivo de financiar as alegacións contra a modificación puntual da PXOM de Mos aprobado en pleno (para darlle encaixe legal ao proxecto do Celta de Vigo e o seu centro comercial).
Nunha comparecencia diante do Pazo Provincial, a alcaldesa de Mos, Nidia Arévalo, e os deputados provinciais do Partido Popular Jorge Cubela, Pepa Pardo, Carmen Amoedo e Alejandro Lorenzo, esixiron “explicacións claras e contundentes” da presidenta da Deputación de Pontevedra Carmela Silva e reclamaron “a asunción de responsabilidades políticas” polo patrocinio dese festival.
“É moi pouco ético e moral que se usen fondos públicos para atacar a un Concello e aos seus veciños”, sinalou, para logo lamentar que se “confunda o papel das institucións co uso partidista”.
Pola súa banda, a alcaldesa de Mos, Nidia Arévalo asegurou que “non se pode permitir que a Deputación insulte” o municipio, polo que avisou con tomar accións legais en caso de ser necesarias. Arévalo insistiu en que “por enriba de todo o proxecto da Cidade Deportiva de Mos hai un paraugas que é a legalidade” e indicou que tamén “se trata dun proxecto beneficioso para Mos”.
