O grupo vigués Vicalsa, experto na prestación de servizos de reparación naval, confirmou este xoves o seu interese polas instalacións do estaleiro Vulcano, en proceso de liquidación, aínda que apuntou que, para garantir a viabilidade do seu proxecto, debe manterse e ampliarse a concesión administrativa outorgada polo Porto.

Viguesa de Calderería, S.A. informou de que está “a traballar na elaboración dun plan de negocio referente á viabilidade da actividade de construción e transformación naval” nas instalacións do estaleiro, no barrio de Teis.

“Para garantir a viabilidade do proxecto, é imprescindible e necesario que a concesión administrativa outorgada pola Autoridade Portuaria de Vigo que teñen concedidas esas instalacións (…) continúe en vigor, e cunha ampliación do prazo de concesión máis aló do 2027“, advertiu o grupo empresarial.

Vicalsa trasladou tamén que, unha vez elaborado ese plan de negocio, presentará oferta polas instalacións de Vulcano “nas próximas semanas”.