O portavoz popular do Concello de Vigo, Alfonso Marnotes, pediu este xoves ao alcalde, Abel Caballero, que dedique no orzamento local, que mañá se someterá a votación no pleno municipal, “menos a gasto corrente e máis a investimento para as obras que prometeu”.

“O goberno local contempla uns orzamentos que concentran todo ao gasto corrente. Conxela o que dedica ás empresas, entidades e familias. Nós pedimos que se reconsidere esa subida de impostos, que non se castigue máis aos vigueses porque ademais o orzamento, ano a ano, non se executa e hai un exceso de ingresos sobre o total dos gastos”, criticou Marnotes nunha rolda de prensa, tal como recolle o PP nun comunicado.

Segundo lamentou, nos últimos anos máis de 120 millóns de euros “quedaron na caixa“. “Ademais, atopámonos que das obras que se prometeron, nada de nada”, insistiu. Entre estes investimentos, o PP referiuse ao Paseo Samil-Bouzas, á reforma da Praza da Miñoca, ao Pavillón de Matamá e á reforma do Paseo do Lagares, entre outras.

Alfonso Marnotes explicou que “este orzamento se basea en pedir un esforzo aos vigueses”. “Pídese que paguemos máis nun momento en que a crise económica asexa. É un orzamento que non dá solución aos problemas da cidade. Que os ten, e non son menores. Por exemplo, nos doce anos de goberno de Caballero hai 2.000 persoas paradas máis e hai 1.130 vigueses menos. A renda dispoñible nesta cidade baixou un 17%”, resolveu o portavoz do PP.