O Grupo Vithas aprobou un investimento de case 800.000 euros en novo equipamento médico para o hospital Nuestra Señora de Fátima de Vigo, que se suman ao “investimento ordinario” en diversas obras de mantemento e mellora das instalacións do centro, segundo destacou a compañía nun comunicado.

Entre o equipamento médico adquirido, atópase no ámbito da uroloxía un ecógrafo de última xeración “coas mellores prestacións do mercado”, así como un láser para a realización de enucleacións de próstata e litiases, e novo material cirúrxico para a cirurxía robótica Da Vinci e o resto de técnicas. Tamén as unidades de Mama e cirurxía xeral, entre outras, incorporarán novas adquisicións.

“Este investimento extraordinario forma parte da clara aposta de Vithas pola excelencia en todos os ámbitos da atención sanitaria e inclúe, tamén, un reforzo nos servizos máis punteiros do hospital e unha progresiva transformación do modelo de servizos médicos cara a especialidades troncais que permitirán consolidar a Vithas e ao seu hospital de Vigo como referente da sanidade privada en Galicia”, subliñou a firma.

Ademais, de forma paralela, o hospital Vithas de Vigo tamén está a incorporar a profesionais “referentes” nas súas respectivas especialidades, “o que permite ampliar a súa carteira de servizos para realizar unha atención de primeiro nivel”.