A Policía Local de Vigo rescatou dous miñatos que entraron no pombal dunha veciña da cidade, e ocasionaron a morte a 15 pombas.

Segundo informaron fontes policiais, os feitos ocorreron a última hora da tarde deste martes, cando unha dotación da UMIR (Unidade Ambiental de Intervención Rural) da Policía Local acudiu a unha vivenda na estrada de Casás, a requirimento dunha muller.

A alertante explicou aos axentes que dúas aves rapaces se introduciran no seu pombal, un habitáculo duns 50 metros cadrados, por dous metros de alto. Os policías comprobaron que, efectivamente, dous miñatos estaban no interior da estancia e que, ademais, mataran 15 pombas.

Os axentes rescataron ás rapaces, que foron devoltas ao seu hábitat natural en perfecto estado. Trátase de aves que se alimentan principalmente de pequenos mamíferos, pero tamén poden comer outras aves novas, réptiles, vermes ou insectos.