O presidente do Parlamento de Galicia, Miguel Santalices, trasladou o pesar da Cámara galega tras a morte dun mozo de 24 anos de idade e veciño de Bueu (Pontevedra) ao sufrir un accidente no pesqueiro no que faenaba na noite deste martes preto das Illas Ons.

Durante a sesión plenaria deste mércores, Miguel Santalices trasladou a “solidariedade e as condolencias” de toda a Cámara para a familia e achegados do falecido.

Segundo confirmaron a Europa Press fontes da Garda Civil, os feitos sucederon sobre as 21,45 horas cando o mozo mariñeiro sufriu un golpe cando faenaba no pesqueiro ‘Novo Cristo da Laxe’, con base en Bueu, e caeu á auga.

Para o rescate foron mobilizadas a patrulleira do Servizo Marítimo da Garda Civil ‘Cuervo Marino’ e o helicóptero ‘Peca 1’ do Servizo de Gardacostas da Xunta. As mesmas fontes concretaron que o mozo, veciño da parroquia de Beluso, faleceu posteriormente.