O alcalde de Vigo, Abel Caballero, arremeteu este mércores contra a delegada da Xunta na cidade e exalcaldesa, Corina Porro, á que acusa de “mentir de forma inconcibible” e de “defender as posicións da Xunta” prexudicando a Vigo.
Así o trasladou o rexedor nunha rolda de prensa na que defendeu que todas as afirmacións que el fai sobre Porro son “verdades incontestables”, ditas “en público” e “suxeitas a contrastación”. A ese respecto, volveu a repetir as acusacións contra a delegada do goberno galego, da que afirmou que “sempre defendeu as posicións da Xunta en contra de Vigo”.
Segundo enumerou, Porro “estivo en contra de Caixanova e a favor de Caixa Galicia” no proceso de fusión das caixas; “nunca” apoiou as demandas da cidade con respecto ao aeroporto de Peinador; estivo “á beira de Fraga” cando este “dixo que Vigo non ía ter AVE” e non estivo nas manifestacións que reclamaban o AVE directo por Cerdedo; “paralizou o plan Nouvell” que o propio Caballero impulsou para reformar o Porto cando presidía este organismo; “non a viu defendendo os xulgados cando o Goberno do PP quixo pechar o partido xudicial”; nin se mobilizou “en defensa da sanidade pública” ou para pedir a gratuidade do aparcadoiro do Álvaro Cunqueiro.
O rexedor olívico tamén reprochou á súa predecesora que estea “definitivamente en contra” da candidatura de Cíes para ser designada Patrimonio da Humanidade; que “segue apoiando á Xunta no seu empeño de que Vigo pague os buses da xente de fóra”; que apoie “os impedimentos” do goberno galego na reforma de Gran Vía ou na aplicación da lei 3/2016 para certos proxectos; ou que apoie o cobro dunha taxa pola xestión da presa de Eiras. “E parece que lle encanta que o Celta vaia xogar a Mos”, engadiu, á vez que reiterou que todas estas afirmacións responden a “realidades” e “feitos incontestables”.
Pola súa banda, Corina Porro, e a preguntas dos xornalistas, referiuse a estas acusacións, e lamentou que ao alcalde da cidade “interésanlle a polémica e a confrontación”. “El, persoalmente, cre que lle vai ben, pero á cidade vaille moi mal con enfrontamentos e leas”, lamentou.
Segundo a delegada do goberno galego, “o único que quere a Xunta” e a propia delegación territorial é “tentar colaborar polo ben dos cidadáns. “El utiliza outros sistemas, pero nós imos seguir traballando por Vigo”, resolveu.
