A secretaria xeral de Emprego, Covadonga Toca, participou este sábado en Vigo na mesa redonda ‘Mulleres con moito que dicir’, organizada pola ONG Asdegal, onde destacou a prioridade da Xunta en materia laboral de conseguir que homes e mulleres teñan as mesmas oportunidades.

Así, no marco dun evento no que tamén se tratou o papel das mulleres na comunicación e a súa situación en África, a secretaria xeral defendeu a igualdade no lugar de traballo, polo que lembrou que en Galicia o paro feminino descendeu nun 5,37%, en comparación con hai un ano.

Toca recoñeceu que a pesar desta evolución positiva, “son necesarios máis esforzos e máis recursos para conseguir unha igualdade real entre homes e mulleres”, tal como recolleu a Xunta nun comunicado.

Neste sentido, explicou que o Goberno galego conta co programa Emprega en feminino, que promove medidas para facilitar a incorporación laboral das mulleres, impulsar o seu desenvolvemento profesional, alcanzar a igualdade na empresa, así como fomentar o emprendemento.