O Festival de Cinema Inclusivo de Vigo presentou este venres a programación completa da súa cuarta edición, que se celebrará no Auditorio Municipal e nos cinemas Salesianos do 22 ao 26 de outubro, e que continuará apostando por facer visibles outras realidades.
Así, unha trintena de títulos, entre longametraxes, curtos, series e webseries, conforman esta programación, de entrada gratuíta, que pretende dar visibilidade a realidades “ocultas ou descoñecidos” a través do audiovisual, así como que o cinema sexa unha arte feita “por e para todas as persoas”.
O director da Axencia Galega das Industrias Culturais (Agadic), Jacobo Sutil, participou no acto deste venres, onde destacou o festival como un encontro “único e pioneiro” que ten no seu valor social o seu principal elemento distintivo dentro do panorama cinematográfico galego.
Tamén asistiu o alcalde de Vigo, Abel Caballero, e a presidenta da Deputación de Pontevedra, Carmela Silva. Esta última subliñou o papel do festival “como factor de apoio á democratización da cultura”, segundo recolleu o ente provincial nun comunicado.
