A delegada da Xunta en Vigo, Corina Porro, anunciou este venres a intención do goberno galego de habilitar un dos edificios xudiciais da rúa Lalín (que se baleirarán a partir do verán que vén, cando se trasladen os xulgados ao antigo Hospital Xeral) para albergar un Centro Integral de Saúde (CIS), con capacidade para atender a unha poboación de 42.000 persoas.

Porro sinalou que ese centro sanitario levará o nome de Olimpia Valencia, a primeira galega licenciada en Medicina. “É unha gran oportunidade de mellorar os servizos sanitarios”, proclamou, e explicou que este novo centro de saúde dará servizo aos pacientes que agora se atenden en ambulatorios “obsoletos”, como o do Nicolás Peña ou o da rúa López Mora.

O CIS Olimpia Valencia incorporará servizos que agora non teñen eses centros de saúde, e estudarase tamén trasladar a esa infraestrutura algúns dos “elementos” do centro de saúde de Pintor Colmeiro, que está “saturado”.

A Xunta, explicou a delegada territorial, levará a cabo o plan funcional e o proxecto para que esta nova dotación sanitaria poida empezar a construírse en canto a actividade actual do edificio se traslade á nova Cidade da Xustiza.

Tras anunciarse, hai uns anos, que o antigo Hospital Xeral sería reformado para albergar os xulgados, foron varias as propostas que se puxeron sobre a mesa acerca dos usos que se darían aos edificios que quedan baleiros. Entre esas propostas, estaba a construción da Biblioteca do Estado, trasladar alí o colexio Altamar, destinalos a dotacións socioculturais ou á Universidade de Vigo.