Delegados da CIG no Banco Santander chegados de distintos puntos de Galicia protagonizaron este venres unha xornada de mobilizacións en Vigo para denunciar que a dirección da entidade bancaria está a utilizar o ERE, ao seu xuízo, para facer unha “purga laboral” de traballadores acollidos a medidas de conciliación, como a redución de xornada por coidado de menores.

Trátase do segundo día de protestas, despois do que tivo lugar o pasado día 4 de outubro na Coruña, co que a organización sindical pretende rexeitar o ERE en marcha. As mobilizacións, que comezaron ás 10,30 horas da mañá, percorreron varias oficinas da entidade situadas por toda a cidade olívica.

Así, a CIG lamentou que o Santander, “de maneira sistemática”, rexeite “moitas das solicitudes de adscrición voluntarias ao ERE presentadas polo persoal de máis de 55 anos”.

“O 90% destas persoas ás que o banco está a presionar para que se acollan ao ERE teñen redución de xornada ou outras medidas de conciliación, polo que queda claro que nesta empresa non se pode conciliar. Se pretendes acollerte a medidas deste tipo non te queren no banco, por iso están a expulsar a esta xente”, lamentou a secretaria da sección sindical da CIG no Santander, Rosa María Conde.

Neste sentido, a representante sindical denunciou que “están a presionar a mulleres menores de 40 anos, que teñen unha antigüidade media na empresa de 10 anos para que se vaian”.

“Persoas que sacrificaron a súa vida persoal e familiar en beneficio do banco agora a dirección decide prescindir delas por motivos económicos, xa que saen máis baratas á hora de aplicar o ERE”, criticou.