Vigo e Galicia reafirmaron este venres o seu compromiso humanitario co pobo do Sahara Occidental e cos refuxiados dos campamentos. Así o trasladou o vicepresidente da Xunta, Alfonso Rueda, que inaugurou a Conferencia Internacional de Cidades Solidarias co Pobo Saharauí, nun acto celebrado no Museo Verbum de Vigo e organizado pola Asociación Solidariedade Galega co Pobo Saharauí (SOGAPS) e a Federación Estatal de Institucións Solidarias co Pobo Saharauí.
Alfonso Rueda, que en decembro de 2014 visitou os campamentos de Tinduf, onde puido comprobar a situación dos refuxiados, destacou que a solidariedade con este pobo non se dá só por parte das institucións, senón que a cidadanía, a través de iniciativas como ‘Vacacións en Paz’, demostra tamén o seu compromiso e proximidade.
O vicepresidente galego lembrou que a Xunta colabora con SOGAPS na prestación de axuda sanitaria na ‘wilaya’ de Bojador e na construción dun centro de cancro de mama na Daira 27. Ademais, a cooperación con esta organización permitiu nos últimos anos levar á práctica outros proxectos de emerxencia alimentaria e axuda sanitaria nos campamentos de refuxiados de Tinduf.
Esta cooperación enmárcase dentro do Plan Director de Cooperación Galega 2018-2021, que identifica como prioridade da acción humanitaria a poboación saharauí. Así, o plan ten como un dos seus obxectivos contribuír a mellorar as condicións de vida das persoas refuxiadas, con especial atención á infancia, mulleres embarazadas e persoas maiores.
