A Xunta impartirá este domingo en Vigo unha nova edición dos cursos gratuítos de condución segura de motocicletas, dirixidas aos usuarios de todo tipo de motocicletas, incluídos aqueles con permiso de conducir B+3, A1, A2 e A que queiran mellorar o control da moto dunha maneira máis segura e eficiente.

Na xornada, que se celebrará nas proximidades do aparcadoiro gratuíto situado fronte ao número 43 da Avenida de Samil, participarán en total 40 motoristas. As clases impartiranse en quendas de 20 persoas, en horario de mañá e tarde.

A formación constará dunha parte teórica, na que se abordarán asuntos como o equipamento para a protección individual, o estado e mantemento da motocicleta, as situacións de risco como a climatoloxía adversa, as freadas, os xiros ou os adiantamentos.

Os asistentes tamén levarán estes conceptos á práctica coa realización de manobras en parado, accións de axilidade e equilibrio, freadas, traxectorias e un itinerario final que inclúe todos os movementos anteriores.