A conselleira de Medio Ambiente, Territorio e Vivenda, Ángeles Vázquez, lembrou a necesidade de que se aprobe de forma definitiva o plan parcial de Navia para avanzar na execución de 1.600 novas vivendas protexidas na zona.

Tras un acto en Vigo, a conselleira detallou que a aprobación do plan compete ao Concello olívico e lembrou a aposta da Xunta para construír vivendas nesta cidade debido á “gran demanda” presente na mesma.

Ademais, concretou que, a continuación, procederase a adxudicar a urbanización do ámbito no que se situarán as novas vivendas do barrio de Navia. Tamén avanzou que se poderán realizar novas expropiacións, que se sumarán aos 50.000 metros cadrados adquiridos en 2016, cando se investiron 10 millóns de euros neste proxecto.

Así mesmo, fixo referencia ás 62 novas vivendas de promoción pública que levan a cabo nas rúas Canicouva e Ignacio Grobas da cidade olívica e que visitou este mércores. Así, lembrou que o Goberno galego destinou case 8,5 millóns de euros a acometer esta actuación, que se suman aos 27 millóns de euros investidos no Casco Vello e aos 11 consignados para a recuperación de inmobles de áreas de rehabilitación integral da cidade.

Mentres, lamentou que o Concello olívico non se adheriu ao plan autonómico de vivendas baleiras, que permitiría ofrecer pisos de titularidade pública e privada a familias con poucos recursos mediante un aluguer social.