O alcalde de Vigo, Abel Caballero, afirmou que a súa próxima revalidación como presidente da Federación Española de Municipios e Provincias (FEMP), que se fará efectiva este mes, supón que a cidade olívica viuse referendada como un “modelo a seguir” para os concellos españois.

No marco dunha rolda de prensa celebrada este luns en Vigo, Caballero remarcou que a política desenvolvida na maior urbe galega converteuse nun “modelo de éxito”, unha situación da que, segundo asegurou, a cidade debe sentirse “moi orgullosa”.

Así mesmo, agradeceu a confianza depositada nel por parte do secretario xeral do PSOE, Pedro Sánchez, para continuar á fronte da FEMP, o que, segundo lembrou Caballero, permitirá que Vigo “encabece a todos os concellos de España”.

En concreto, Pedro Sánchez trasladou a súa aposta polo rexedor olívico para revalidar o seu mandato como presidente da federación este fin de semana en Toledo, no marco do Consello de Política Municipal do PSOE.

A decisión farase efectiva o próximo 21 de setembro en Madrid, durante a celebración do 12º Pleno da FEMP. Deste xeito, elixirase o presidente da institución e votaranse as candidaturas dos equipos que liderarán a federación ao longo do próximos catro anos.