O alcalde de Vigo, Abel Caballero, expresou este luns a súa confianza en que “máis cedoque tarde” a Biblioteca do Estado estará “en construción”, nos terreos que o Concello prevé ceder ao Ministerio de Cultura, por detrás dos actuais xulgados.

Así o trasladou o rexedor en rolda de prensa, e informou de que reiterou ao Ministerio a “oferta” do Concello de ceder ese espazo para a construción dun edificio “singular” que albergue a Biblioteca do Estado.

O alcalde afirmou que “todo o mundo sabe que esa é a proposta boa, a única adecuada”, en referencia á posibilidade, exposta pola Xunta e que el rexeita, de que a biblioteca puidese instalarse nos actuais edificios xudiciais (tendo en conta que a actividade dos mesmos trasladarase á nova cidade da Xustiza, no antigo Hospital Xeral).

Abel Caballero lembrou que “o Goberno de Rajoy paralizou” o proxecto da Biblioteca do Estado para Vigo, “sacándoo dos orzamentos”, e que foi o Executivo de Pedro Sánchez o que o retomou. “Con tanta simpatía viuno o actual Goberno, que enviou aos seus técnicos”, apostilou o rexedor.

Así, tras recoñecer que a actual situación política, cun goberno central en funcións, non permite iniciar o proxecto, expresou a súa confianza en que a obra estará en marcha “máis pronto que tarde”