Axentes da Policía Nacional da Comisaría de Vigo detiveron a un mozo veciño da cidade como presunto autor dun delito de agresión sexual, tras a denuncia dunha menor de idade, da que supostamente abusou tras levala ao seu domicilio cando a moza estaba bebida.
Segundo informaron fontes policiais, os feitos remóntanse a finais de xullo, cando a vítima se atopaba nas festas de Bouzas cun grupo de amigos, aos que se uniu o detido (do que ela xa tiña algunhas referencias por redes sociais).
Avanzada a madrugada, os amigos empezaron a marchar, mentres que a moza optou por quedar na festa co sospeitoso e outro coñecido. Nun momento determinado, a menor (que consumira alcol) dixo que non se atopaba ben, e o agora detido ofreceuse a deixala durmir na súa casa, alí preto, e levala ao día seguinte ao seu domicilio.
A moza aceptou a oferta pero, á mañá seguinte, e aínda que non lembraba moitas cousas das horas previas, foi consciente de que fora agredida sexualmente.
Por iso, interpuxo denuncia en Comisaría, e efectivos da Unidade de Familia e Menores (UFAM) iniciaron unha investigación, que culminou coa identificación do presunto autor dos feitos. Dáse a circunstancia de que o sospeitoso xa foi investigado anteriormente en relación a outros casos de agresión sexual, e ten antecedentes policiais por outros delitos.
O presunto agresor foi localizado e detido pola Policía Nacional nas Illas Cíes, nun control de visitantes enmarcado no Plan Verán Seguro despregado pola Comisaría. As pescudas permitiron acoutar o círculo de busca e logrouse identificar a un home como presunto autor dos feitos.
Ao contactar coa vítima esta recoñeceuno, polo que se procedeu á súa detención e traslado a dependencias policiais, onde se realizou unha comprobación das bases de datos na que se corroborou que contaba con antecedentes anteriores. O detido foi posto a disposición do Xulgado de Instrución número 6 dos de Vigo, remitindo ademais todo o actuado.
A investigación foi levada a cabo polo grupo de UFAM da Brigada de Policía Xudicial da Comisaría de Policía Nacional de Vigo-Redondela.
