A planta coa que conta o Grupo PSA Peugeot Citroën en Vigo trasladou ao Consorcio da Zona Franca o seu interese na ampliación sur do Polígono de Balaídos, tras informar á Xunta, implicada na tramitación urbanística necesaria para acometer esta actuación.

Segundo detallaron fontes de PSA, o obxectivo desta actuación, que xa se abordou anteriormente co consorcio, pasa por crear unha “zona de transición” entre o espazo industrial e o residencial, así como por permitir a implantación de provedores de servizos loxísticos e pezas automobilísticas. A planta viguesa afirmou así que se trata dunha actuación “estratéxica” para a zona a “medio prazo”.

Así mesmo, solicitou á Zona Franca a planificación dun aparcadoiro de camións nas inmediacións da conexión sur coa VG-20 que permita atender as necesidades do polígono empresarial.

Neste sentido, sinalou que o transporte da práctica totalidade de pezas e vehículos de PSA con destino á Península acceden ou abandonan a planta por esta saída, pola que, segundo apuntou, discorren tamén mercadorías doutras empresas instaladas en Balaídos.

Tamén lembrou o incremento rexistrado na produción de vehículos comerciais lixeiros nas instalacións de PSA en Vigo, que alcanzou un tráfico de 600 camións diarios, e avanzou que se espera un ascenso do mesmo debido ao próximo lanzamento do novo Peugeot 2008. Ante esta situación, remarcou a “urxencia” de acometer esta actuación.